እቲ ንቀዳም 24 ጥቅምቲ 2026፡ ኣብ ሪያድ፡ ስዑዲ ዓረብ ክካየድ ተመዲቡ ዝነበረ ናይ መጀመርታ ታሪኻዊ ዋዕላ መራሕቲ ሃገራት ሕብረት ኤውሮጳን (EU) ባይቶ ምትሕብባር ወሽመጥ ዓረብን (GCC) ብሰንኪ ስግኣት ጸጥታ ንግዚኡ ተሰሪዙ ክብል ማዕከን ዜና ዶቸ ቬለ፡ 15 ጥቅምቲ ጸብጺቡ።
እቲ ጸብጻብ ንዲፕሎማስያዊ ምንጭታት ብምጥቃስ ከም ዝሓበሮ፡ ሕብረት ኤውሮጳ ነዚ ውሳነ ዘመሓላለፈሉ ቀንዲ ምኽንያት፡ እቲ ብኢራን ዝድገፍ ዓመጽቲ ሑቲ የመን (ኣንሳር ኣላህ) ኣብ ልዕሊ ርእሰ ከተማ ስዑዲ ዓረብን ስትራቴጂካዊ መሳለጥያታታትን ዝፍጽምዎ ዘለዉ ተደጋጋሚ መጥቃዕቲ ሚሳይላትን ሰብ-ኣልቦ ነፈርትን (ድሮን) ብምስጋእ ምካኑ እዉን ተገሊጹ።
እዚ ዋዕላ እዚ፡ ኣብ መንጎ እተን 27 ኣባላት ዘለዋ ሕብረት ኤውሮጳን 6 ኣባላት ዘለዋ ባይቶ ምትሕግጋዝ ወሽመጥ ዓረብን ዘሎ ቁጠባዊ ርክብ ንምሕያልን፡ ብፍላይ ድማ ኣብ ዓውዲ ጸዓትን ምስጋር ቴክኖሎጅን ስትራቴጂካዊ ምሕዝነት ንምምስራትን ዓቢይ ትጽቢት ተገይሩሉ ዝነበረ እዩ።
ሕብረት ኤውሮጳ እቲ ዋዕላ ተሰሪዙ ዘይኰነስ ንኻልእ ዝጥዕም እዋን ከም ዝሰጋገር እኳ ተገለጸ፡ ክሳዕ ሕጂ ግን ብንጹር ዝተወሰነ ሓድሽ ዕለትን ቦታን ኣይተሓበረን ዘሎ።
እዚ ምቁራጽ ዋዕላ ዝፍጸም ዘሎ፡ ኣብ መንጎ ሓይሊ ኣየር ስዑዲ ዓረብን ዕጡቓት ሑቲን ዝካየድ ዘሎ ናይ ሕነ ምፍዳእ ደብዳባትን መጥቃዕታትን ብምቕጻሉ፡ እቲ ዞባ ኣብ ከቢድ ወተሃደራዊ ስግኣትን ሓደጋን ወዲቑ ኣብ ዘሎዎሉ እዋን እዩ።
