መንግስቲ ግብጺ ኣብ መንጎ ስዑዲ ዓረብን ዕጡቓት ሑቲ የመንን (ኣንሳር ኣላህ) ዝካየድ ዘሎ ደማዊ ኲናት ንምቁራጽ፡ ህጹጽ ፖለቲካዊ ፍታሕ ክግበረሉ ጻውዒት ኣቕሪቡ ክብል ዴቸ ቬለ ጸብጺቡ።
ሚኒስተር ጉዳያት ወጻኢ ግብጺ በደር ዓብደላተይ፡ ሎሚ 22 ጥቅምቲ፡ ኣብ ዝሃቦ መግለጺ፤ እቲ ንነዊሕ እዋን ዝቐጸለ ግጭት ንኸብቅዕ ዘተኰረ ዲፕሎማስያውን ፖለቲካውን ጻዕርታት ብዝለዓለ መልክዑ ክሕይሉ ኣድላዪ ምዃኑ ሓቢሩ።
ግብጺ ንመንግስቲ ሪያድ ዘለዋ ምሉእ ደገፍ ብምግላጽ፤ ነባሪ ርግኣት ክመጽእ ዝኽእል ግን ብፖለቲካዊ ዘተ ጥራይ ከምዝኾነ እቲ ሚኒስተር ኣገንዚቡ።
ንሱ ወሲኹ፡ ዕጡቓት ሑቲ ካብቶም ኣብ ቀረባ እዋን ዝሓዝዎም ስትራተጂካዊ ቦታታት ክወጹ ዘገድድ ስምምዕ ሰላም ክግበር ከም ዝግባእ ሓቢሩ።
እቶም ብኢራን ዝድገፉ ዕጡቓት ሑቲ፡ ኣብዚ ሕጂ እዋን ኣገዳሲ ወሽመጥ ባብ ኤል-ማንዳብ ሓዊሱ ሓያሎ ስትራተጂካዊ ከባቢታት ተቖጻጺሮም ይርከቡ። እቶም ዕጡቓት ስዑዲ ዓረብ ኣብ ልዕሊኦም ንእትፍጽሞ መጥቃዕቲ ኣየር ሕነ ንምፍዳይ፤ ብተደጋጋሚ ብሰብ-ኣልቦ ነፈርቲ፡ ኣብ ውሽጢ ሪያድ ዝርከቡ ወተሃደራውን ቁጠባውን ትካላት መጥቃዕቲ ይፍጽሙ ኣለዉ።
እቲ ዝኸይድ ዘሎ ግጭት፡ ኣብዚ ዝሓለፈ ክልተ ሳምንታት ጥራይ ኣብ ውሽጢ ስዑዲ ዓረብ ህይወት 24 ሰባት ከሓልፍ ከሎ፡ ካብ ዝሓለፈ ወርሒ መስከረም ጀሚሩ ድማ ኣብ ውሽጢ የመን ብኣማኢት ዝቑጸሩ ሰባት ተቐቲሎም፡ ልዕሊ 250,000 ሰባት ካብ ቤት ንብረቶም ከም ዝተመዛበሉ ይጠቅስ።
እዚ ብግብጺ ዝግበር ዘሎ ጻውዒት፤ ፕረዚደንት ዓብደልፈታሕ ኣል ሲሲ ሰላምን ጸጥታን ስዑዲ ዓረብ ንምሕላው ድልው ምዃኑን ኣድላዪ እንተኾይኑ ድማ ሰራዊት ንምውፋር ድሕሪ ምግላጹ ሓደ ሰሙን ጸኒሑ ዝግበር ዘሎ ምዃኑ ዝፍለጥ’ዩ።
