ሑቲ፡ ኣብ ልዕሊ ስዑዲ ዓረብ ኣርባዕተ መጥቃዕቲ ከም ዝፈጸመ ገሊጹ

ኣብ የመን ዝንቀሳቐስ ጉጅለ ሑቲ፡ ኣብ ዝሓለፉ 48 ሰዓታት ኣብ ስዑዲ ዓረብ፡ ኣብ ዝርከቡ ወተሃደራውን ቁጠባውን ትካላት ኣርባዕተ መጥቃዕቲ ከም ዝፈጸመ ኣፍሊጡ።

እቲ ጉጅለ ባሊስቲክ ሚሳይላትን ሰብ-ኣልቦ ነፈርትን ከም ዝተጠቕመ ኣፈኛ እቲ ጉጅለ ያህያ ሳሪ ገሊጹ።

እቲ ብሑቲ ዝተጠቕሰ ዒላማታት፡ ኣብ ሪያድ ዝርከብ ህንጻ ሚኒስትሪ ምክልኻል ስዑዲ ዓረብ፡ ኣህጉራዊ መዓርፎ ነፈርቲ ንጉስ ፋህድ ኣብ ደማም፡ መዓርፎ ነፈርቲ ኣብሃን ኣብ ያንቡ ዝርከቡ መሳለጥያታት ኩባንያ ነዳዲ ኣራምኮን ዝርከብዎ’ዩ።

ኣብ መዓርፎ ነፈርቲ ንጉስ ፋህድ ኣብ ደማም ብዝተፈጸመ መጥቃዕቲ፡ ክልተ ሰባት ከም ዝሞቱን ሸሞንተ ካልኦት ከም ዝቖሰሉን ሰበ-ስልጣን ስዑዲ ሓቢሮም።

ሮይተርስ ከም ዝጸብጸቦ ድማ፡ ኣራምኮ ኣብ ዳህራን ዝርከብ ቤት ጽሕፈቱ ንሰራሕተኛታቱ ክወጹን ብርሑቕ ክሰርሑን ኣዚዙ።

እንተኾነ፡ ኩሎም እቶም ብሑቲ ዝተጠቕሱ ዒላማታት ብቐጥታ ከም ዝተሃርሙን ዝበጽሐ ጉድኣትን ብናጻ ምንጪ ምሉእ ብምሉእ ኣይተረጋገጸን ዘሎ።

እቲ ሓድሽ ምዕባለ፡ ኣብ መንጎ ሑቲን ስዑዲ ዓረብን ዘሎ ወተሃደራዊ ግጭት እናተጋደደ ምዃኑ ተንተንቲ ይገልጹ።