ጆርጅ በርናርድ ሾው (George Bernard Shaw)፡ ኣብ ታሪኽ ዓለም ስነ-ጽሑፍ ፍሉይ ቦታ ዝሓዘ ኣየርላንዳዊ ደራሲ፡ ተዋስኦ ጸሓፊን ማሕበራዊ ነቓፊን እዩ።
ሾው፡ ብዕለት 26 ሓምለ 1856 ኣብ ደብሊን-ኣየርላንድ ተወሊዱ።
ንሱ፡ ብፍላይ ብበሊሕ ቀልዱ፥ ነቐፌታዊ ኣተሓሳስባኡን ንማሕበራዊ ልምድታትን ዝተመስረቱ ኣረኣእያታትን ጸኒዑ ዝብድህ ጽሑፋቱን ይፍለጥ።
ሾው፡ ካብ 60 ንላዕሊ ተዋስኦታት ዝጸሓፈ ኮይኑ፡ ኣብ ፖለቲካዊ ዛዕባታት፥ ኣብ ማሕበራዊ ፍትሒ፥ ኣብ ጉዳይ ድኽነት፥ ሃይማኖትን ሰብኣዊ ርክባትን ኣድሂቡ ዝተፈላለዩ ኣርእስታት ብምድህሳስ ጽሒፉ’ዩ።
ብፍሉይ ቅዲ ጽሕፈቱን ብልሒ ነቐፌታኡን ድማ ሻቭያን ሳታየር ‘Shavian Satire’ ዝብል መጸውዒ ተጓናጺፉ’ዩ።
ኣብ 1925 ኣብ ዓውዲ ስነ ጽሑፍ ኣድሂቡ ብዝገበሮ ደርማስ ኣበርክቶ ሽልማት ኖበል ተቐቢሉ።
ብድሕሪኡ ድማ፡ ኣብ 1938 ናብ ፊልም ዝተቐየረ ተዋስኦኡ “Pygmalion”፡ ኣብ 1939 ሽልማት ኦስካር ኣረኣእያ ተዓዊቱ እዩ።
በዚ ድማ ሽልማታት ኖበልን ኦስካርን ዝተዓወተ ቀዳማይ ዉልቀሰብ ኮይኑ ኣብ ታሪኽ ተመዝጊቡ’ዩ።
ጆርጅ በርናርድ ሾው፡ ብዕለት 2 ሕዳር 1950፡ ኣብ መበል 94 ዓመት፡ ኣብ ኣዮት ሴንት ሎውረንስ፡ ሄርትፎርድሻየር ዓዲ እንግሊዝ ዓረፈ።
ስራሓውቱ ክሳዕ ሎሚ ኣብ መድረኻት ተዋስኦን ኣብ ስነ-ጽሑፍ ዓለምን ብሰፊሑ ካብ ዝንበቡን ዝቐርቡን እዮም።
ሾው፡ ብዝሓደጎ ስነ-ጥበባውን ሓሳባውን ውርሻ፡ ኣብ ታሪኽ ደረስቲ ዓለም ዘይርሳዕ ስም ኮይኑ ከም ሃረም ጸኒዑ ይርከብ ኣሎ።
ክቡራት ተኸታተልትና፡ ጽባሕ ዕለት 2 ሕዳር ብምዃኑ ንሾው ምኽንያት ገይርና ናይ ሰንበትና እናዘከርና፡ ንስኹም ድማ ኣብ ኤርትራ ይኹን ኣብ ኣፍሪቃ፡ ኣብ መዳይ ስነ ጽሑፍ ዓለም ዓቢይ ኣበርክቶ ዝገብረ መን ኣሎ ትብሉ፧
ርእይቶኩም ጽሓፉልና ኢኹም።
