ናይጀርያዊ ቢልዮነር ኣሊኮ ዳንጎቴ፡ ኣስታት 1,300 ኪሎሜትር ዝሽፍን መስመር መጓዓዝያ ፍርያት ነዳዲ ኩባንያ ኬንያ ፓይፕላይን (KPC) ንምስፋሕ፡ 1.5 ቢልዮን ዶላር ኣሜሪካ፡ ማለት ኣስታት 195 ቢልዮን ሽልንግ ኬንያ፡ ከውፍር መደብ ከም ዘለዎ ፋይናንሻል ታይምስ ሓቢሩ።
እዚ ምዕባለ፡ ዳንጎቴ ኣብ ኩባንያ KPC 24.76 ሚእታዊት ብጽሒት ብ42.5 ቢልዮን ሽልንግ ኬንያ፡ ማለት ኣስታት 327 ሚልዮን ዶላር፡ ድሕሪ ምዕዳጉ ዝመጸ’ዩ።
እቲ ምስግጋር 4.5 ቢልዮን ብርክታት ኣብ 19 ጥቅምቲ ኣብ ቦርሳ ብርኪ ናይሮቢ ተፈጺሙ።
ዳንጎቴ፡ ኣብ ለንደን ኣብ ዝተኻየደ ዋዕላ ኣፍሪቃ ፋይናንሻል ታይምስ፡ እቲ ወፍሪ ምንቅስቓስን ምክፍፋልን ፍርያት ነዳዲ ንምምሕያሽን ንዞባዊ ኣቕርቦት ነዳዲ ንምድልዳልን ከም ዝሕግዝ ገሊጹ።
እቲ መደብ ወፍሪ፡ ዳንጎቴ ኣብ ላሙ፡ ኬንያ፡ ክሃንጾ ዝጀመረ 16 ቢልዮን ዶላር ዝግመት ሓድሽ መጽረዪ ነዳዲ ፕሮጀክት እውን ብተዘዋዋሪ ክድግፍ ይኽእል። እቲ መጽረዪ ነዳዲ፡ መዓልታዊ 700,000 በርሚል ነዳዲ ናይ ምጽራይ ዓቕሚ ክህልዎ ተመዲቡ ኣሎ።
እንተኾነ፡ ክሳዕ ሕጂ እቲ ምስፋሕ መስመር ብኸመይ ከም ዝምወልን መዓስ ከም ዝጅምርን ዝምልከት ምሉእ ዝርዝር ሓበሬታ ኣይተገልጸን ክብላ ጸብጻብ ማዕከናት ዜና ፋይናንሻል ታይምስ፥ ሮይተርስን ቢዝነስ ዴይሊ ኣፍሪካን የመልክት።
