ፕረዚደንት ናይጀርያ ቦላ ቲኑቡ፡ ንምርጫ 2027 ዝዓለመ ወፍሪ ዳግማይ ምርጫኡ ምጅማሩ ትማሊ 25 ጥቅምቲ 2026 ዝተዘርግሐ ጸብጻብ ማዕከን ዜና ዶቸ ቬለ ይሕብር።
ፕረዚደንት ናይጀርያ ቦላ ኣሕመድ ቲኑቡ፡ ኣብ ምርጫ ፕረዚደንትነት፡ 16 ጥሪ 2027 ንኻልኣይ እዋን ንምምራጽ ዝዓለመ ወፍሪ ምርጫኡ፡ ብ24 ጥቅምቲ ኣብ ሰሜናዊት ከተማ ካዱና ብምእካብ ሽማግለታትን ደገፍቱን ብወግዒ ጀሚሩ።
ኣብቲ ኣኼባ፡ ቲኑቡ ንፖሊሲታት ቁጠባዊ ምምሕያሽ መንግስቱ ብምክልኻል፥ ንመጻኢ ሃገሩ ዝሓሸ ቁጠባዊ ኩነታትን ብልጽግናን ከምጽእ ቃል ኣትዩ።
ካብ 2023 ኣትሒዙ ኣብ ስልጣን ዝጸንሐ ቲኑቡ፡ ድጎማ ነዳዲ ብምቁራጽን ናይጀርያዊ ባጤራ ናይራ ዋጋኡ ክንኪ ብምግባርን ካልኦት ቁጠባዊ ለውጥታት ኣተኣታትዩ እዩ።
እቶም ስጉምትታት ንገለ መለክዒታት ቁጠባ ከም ዘመሓየሹ እኳ እንተተገለጸ፡ ኣብ ልዕሊ ዜጋታት እታ ሃገር ጽኑዕ ጸቕጢ መነባብሮ፥ ወሰኽ ዋጋታትን ድኽነትን ኣስዒቦም እዮም።
ቲኑቡ ግን ነቲ ዝቐርበሉ ነቐፌታ ብምንጻግ፡ ስርሑ ንጸገማት ህዝቢ ንምፍታሕ ምዃኑ ገሊጹ።
ኣብ ዝመጽእ ምርጫ፡ ቲኑቡ ምስ ነበር ምክትል ፕረዚደንት ኣቲኩ ኣቡባካርን ነበር ኣመሓዳሪ ግዝኣት ፒተር ኦቢን ካልኦት ተወዳደርትን ክገጥም ትጽቢት ይግበር።
ብዘይካ ቁጠባዊ ኩነታት፥ ጸጥታ፥ ብረታዊ መጥቃዕትታትን ጭውያን እውን ኣብቲ ወፍሪ ምርጫ ቀንዲ ጉዳያት ክኾኑ እዮም።
ቀንዲ ብድሆ ቲኑቡ፡ ኣብ መንጎ ዘተኣታተዎም ቁጠባዊ ለውጥታትን፡ ኣብ መነባብሮ ህዝቢ ዝጭበጥ ለውጢ ምምጻእን ዘሎ ፍልልይ ንመረጽቲ ከእምን ምኽኣል ክኸውን ከም ዘሎዎ እቲ ጸብጻብ የመልክት።
